خرج ابن آدم / صلاح جاهين

شارك هذه المقالة مع أصدقائك!

صلاح جاهين

 

خرج ابن آدم من العدم قلت : ياه

رجع ابن آدم للعدم قلت : ياه

تراب بيحيا … وحي بيصير تراب

الأصل هو الموت و الا الحياه ؟

عجبي !!!

——————

نوح راح لحاله والطوفان استمر

مركبنا تايهه ولسه مش لاقيه بر

اه م الطوفان واهين عليك يا بر

ازاي تقدر تبان والدنيا غرقانه شر

عجبي !!

———————

الفيلسوف قاعد يفكر سيبوه

لا تعملوه سلطان و لا تصلبوه

ما تعرفوش إن الفلاسفه يا هوه

اللي يقولوه بيرجعوا يكدبوه

عجبي !!!

————————

أيوب رماه البين بكل العـــــــــلل

سبع سنين مرضان وعنده شلل

الصــــبر طيب .. صبر أيوب شفاه

بس الأكـــــــــاده مات بفعل الملل

عجبي !!!

————————-

كان فيه قمر كأنه فرخ الحمام

علي صغره دق شعاع شق الغمام

أنا كنت حاضر قلت له ينصرك

إشحال لما حتبقي بدر التمام

عجبي !!

————————-

أنا دبت و جــزمتى نعلهــا داب
من كتر التدوير ع الاحـــــباب
يا سلملم لو أعتر فى حبيـــــب
ده انا أرقص من كتر الأعجاب

كدا هو كدا هو كدا هو

 

[youtube]http://www.youtube.com/watch?v=MMKDX7S0zVM&feature=youtube_gdata[/youtube]

0
Facebooktwitterredditpinterestlinkedinmail
‫0 تعليق

اترك تعليقاً