Articles Comments

» أدب » نون.. / طلال حيدر

نون.. / طلال حيدر

Share on FacebookTweet about this on TwitterShare on TumblrEmail this to someoneShare on LinkedInShare on Reddit



مشتاق

إيديّي غمر مفتوح متل النون

معجّل

متل جملة ما فيها سكون

ولا بنهدى

والوقت ما عنده وقت ينطر حدا

يمكن أنا مجنون

هيّ ِ

متل شي خط بريشة قصب

وهوّ ِ

متل حرف العرب

مرفوع بالضمة

منصوب بالفتحة

وبالفتحة هرب

بس يكتروا ببالُه

بيصير واو ونون

وبس يسكن بحاله

بيصير همزه

أو بيصير سكون

قرآن مفتوح بهدا

متل المصلاّية

نقّوا شي سوه هينه

تنبلش قرايه

وعبله على ضهر الفرس

حلوه متل آيه

كل الحروف منكسّه

إلا الألف رايِه

ألله شو حلوه الألف

بس تنحكى حكايه

سبعه لغات العرب

عندي مخباية

ع كتر ما القوس انحنى

صار السهم غايه

هـ الأرض

اسوارة دهب

زينه مضوايه

جبلي بطريقك حلق

إدني.. معرّايه

وصيت صايغ حلب

قللي الحلق جايي

وضاعت

يا مين يلاقيا

وياخد هـ المرايه…

 

Filed under: أدب

أضف تعليقاً

*